Ali Ahmeti pranon humbjen lokale dhe paralajmëron ristrukturim të BDI-së

Kreu i BDI-së, Ali Ahmeti, iu drejtua mediave sonte duke pranuar humbjen në zgjedhjet për kryetarë komunash dhe duke njoftuar se partia do të bëjë një rishikim të thellë të strukturave të saj, me qëllim të përforcimit dhe rinovimit të radhëve.

“Rezultatet tashmë janë të qarta në nivel kombëtar. Edhe pse kemi fituar mbi 23 mijë vota më shumë, kjo nuk na mjaftoi për të siguruar fitore në zgjedhjet për kryetarë komunash. Ne e pranojmë këtë realitet. Vota e shumicës na jep një mandat moral dhe politik për të vazhduar punën tonë. Humbja e disa pozitave na inkurajon që të forcojmë strukturat dhe të afrohemi më shumë me qytetarët. Do të bëjmë një analizë të hollësishme dhe do të rinovojmë radhët tona për të filluar më të fortë, me bindjen se kjo është rruga e duhur,” deklaroi Ahmeti.