Maldivet u ndalojnë brezave të rinj pirjen e duhanit

Të lindurve nga 1 janari i vitit 2007 e tutje, Maldivet ua kanë ndaluar të pinë duhan, duke u bërë i vetmi vend në botë që zbaton një “ndalim brez pas brezi” të duhanit në të gjithë vendin.

Ministria e shëndetësisë njoftoi se do të ishte e paligjshme që brezat e rinj të përdorin, blejnë ose shesin duhan brenda vendit, transmeton albinfo.ch.

Sipas njoftimit, ndalimi pasqyron angazhimin e fortë të qeverisë për të mbrojtur të rinjtë nga dëmet e duhanit.

Tutje, bëhet e ditur se ndalimi i ri “zbatohet për të gjitha format e duhanit dhe shitësit me pakicë janë të detyruar të verifikojnë moshën para shitjes”, tha ministria e shëndetësisë, duke shtuar se ai përputhet me detyrimet e Maldiveve sipas Konventës Kornizë të Organizatës Botërore të Shëndetësisë për Kontrollin e Duhanit.

Sipas organit shëndetësor të OKB-së, kjo konventë “ofron një përgjigje globale ndaj një problemi global – domethënë, epidemisë së duhanit”.