Zviceranët, rekord të udhëtimeve me tren gjatë vitit të kaluar

Njerëzit në Zvicër udhëtuan mesatarisht pothuajse 1,000 kilometra më shumë me tren sesa ata në Austri, shtet ky që mban vendin e dytë

Asnjëherë më parë njerëzit në Zvicër nuk kanë udhëtuar mesatarisht aq gjatë me tren sa vitin e kaluar, sipas shoqatës së transportit publik Litra.

Mesatarisht, çdo banor i Zvicrës ka udhëtuar 2,519 kilometra me tren vitin e kaluar, transmeton albinfo.ch. Kjo është pak më shumë se në vitin e mëparshëm rekord që ishte viti 2019.

Krahasuar me BE-në, Norvegjinë dhe Britaninë e Madhe, Zvicra është gjithashtu liderja e qartë në listën evropiane të udhëtimeve me tren, shkruan srf.ch.

Njerëzit në Zvicër udhëtuan mesatarisht pothuajse 1,000 kilometra më shumë me tren sesa ata në Austri, shtet ky që mban vendin e dytë.

Greqia doli e fundit, me 70 kilometra udhëtim me tren për person vitin e kaluar.

Zvicra prej kohësh është bindshëm e para sa i përket shfrytëzimit të hekurudhës në mesin e të gjitha shteteve në Evropë. Në nivel botëror vetëm Japonia është para Zvicrës, në këtë aspekt.

---