Studim: Asnjë helmetë skijmi nuk mbron në shpejtësi mbi 50 km/h

pixabay

Një test i ri i kryer në Zvicër ka zbuluar se asnjë prej helmetave më të përdorura të skive nuk ofron mbrojtje të mjaftueshme në rast aksidenti me shpejtësi të lartë. Rezultatet kanë ngritur shqetësime serioze për sigurinë në pistat e skive, ku skiatorët sot lëvizin shumë më shpejt se standardet e përcaktuara për prodhimin e helmetave.

Programi investigativ i RTS, “À Bon Entendeur”, testoi 16 modele helmetash nga markat kryesore si Oakley, Uvex, Atomic, Head, Salomon, Giro, POC dhe Wedze. Asnjë prej tyre nuk e përballoi një goditje me 50 km/h ose një përplasje ballore mes dy skiatorëve që lëvizin me 35 km/h. Sipas matjeve, ndikimi në tru mund të arrijë deri në 2400 G, nivele që ekspertët i konsiderojnë potencialisht fatale.

Megjithatë, të gjitha helmetat e testuara i plotësojnë kërkesat ligjore. Problemi, sipas specialistëve, qëndron te standardi evropian EN 1077, i cili garanton mbrojtje vetëm deri në shpejtësinë 20 km/h — shumë larg realitetit të pistave. Një analizë e SUVA-s tregoi se 75% e skiatorëve zbresin me mbi 50 km/h, ndërsa 18% arrijnë deri në 75 km/h, transmeton albinfo.ch.

Profesori i EPFL-së, Dominique Pioletti, paralajmëron se standardet duhet të rishikohen urgjentisht. Sipas tij, helmetat mund të përmirësohen për të ofruar mbrojtje deri rreth 40 km/h — dy herë më shumë sesa kërkohet aktualisht — por jo për shpejtësi edhe më të larta. Ai gjithashtu thekson se testet aktuale nuk marrin parasysh rrotullimin e kokës, një faktor kyç në lëndimet e rënda të trurit.

Prodhuesit, përfshirë GIRO, POC dhe HEAD, reaguan duke deklaruar se testet e RTS nuk përputhen me protokollet zyrtare të certifikimit dhe se helmetat e tyre plotësojnë të gjitha standardet e sigurisë. Megjithatë, ata pranojnë se asnjë helmetë nuk mund të mbrojë në çdo situatë.

Pavarësisht kufizimeve, ekspertët theksojnë se mbajtja e helmetës mbetet thelbësore dhe redukton ndjeshëm rrezikun e dëmtimeve të rënda në shumicën e aksidenteve.