Ofertë 10 vjeçare për Blerim Xhemailin

Futbollisti shqiptar Blerim Xhemaili mund të largohet nga ekipi aktual Galatasaray për t`u rikthyer në Zvicër

Këto ditë anëtari i përfaqësueses zvicerane ka pranuar një ofertë mjaft joshëse nga nënkampioni i Zvicrës, Young Boys.
Klubi verdh e zi i ka ofruar kontratë 10 vjeçare mesfushorit shqiptar.

Gazeta zvicerane “Blick”, shkruan se presidenti i klubit Christian Constan ka udhëtuar me avionin privat për në Stamboll ku pritet t`ia paraqesë ofertën futbollistit Xhemaili, transmeton “albinfo.ch”.

Në kontratë parashihet një marrëveshje pesë vjeçare si futbollist ndërsa pesë vite të tjera Xhemaili do ta bëjë punën e drejtorit sportiv në klub.

Në anën tjetër klubi turk Galatasaray është pajtuar që ta shesë Xhemailin për dy milionë euro, shumë kjo që nuk paraqet problem për ekipin Young Boys.

Edhe pse djaloshi nga Tetova ka marrë oferta edhe nga Seria A dhe Liga Premier, duket se kjo ofertë mund ta bindë atë që të kalojë në kryeqytetin zviceran, në Bernë.