Kalimi nëpër Serbi, gjashtë arrestime dhe një rrëmbim gjatë vitit 2025

Gjatë vitit 2025, autoritetet serbe kanë arrestuar gjashtë shtetas të Kosovës dhe dyshohet edhe për një rast rrëmbimi, kryesisht gjatë udhëtimeve transit përmes territorit të Serbisë. Shumica e të ndaluarve janë akuzuar për “krime lufte” ose “shkelje të rendit kushtetues të Serbisë”, akuza që familjarët dhe avokatët i konsiderojnë të pabazuara dhe politikisht të motivuara, shkruan albinfo.ch.

Një nga rastet më të përfolura është ai i Tefik Mustafës, i cili u ndalua në qershor 2024 në pikëkalimin kufitar të Merdarës dhe kaloi 13 muaj në paraburgim në Serbi, për t’u liruar më pas si i pafajshëm. Familja e tij thotë se ai ka pësuar pasoja të rënda fizike dhe psikologjike nga kushtet e burgimit dhe aktualisht po trajtohet mjekësisht në Zvicër.

Vëzhguesit dhe ekspertët e lidhin valën e arrestimeve me ndërprerjen e dialogut Kosovë–Serbi dhe mungesën e bashkëpunimit mes sistemeve të drejtësisë. Sipas tyre, qytetarët po kthehen në “kolateral politik” të tensioneve mes dy vendeve.

Ministria e Punëve të Jashtme dhe Diasporës e Kosovës ka përsëritur thirrjet që qytetarët të shmangin udhëtimin përmes Serbisë, duke vlerësuar se ky territor nuk ofron siguri minimale juridike dhe fizike për shtetasit kosovarë.

Një artikull më i zgjeruar mbi këtë temë mund ta lexoni në Radion Evropa e Lirë.