Përfundojnë takimet Ukrainë-SHBA-Rusi, Zelensky i quan konstruktive

Keystone (AP Photo/Efrem Lukatsky)

Presidenti i Ukrainës, Volodymyr Zelensky, ka bërë të ditur se bisedimet dyditëshe trepalëshe me Rusinë dhe Shtetet e Bashkuara në Abu Dhabi janë përmbyllur me “diskutime konstruktive” mbi “parametrat e mundshëm për t’i dhënë fund luftës”.

“Të gjitha palët ranë dakord të raportojnë në kryeqytetet e tyre për secilin aspekt të negociatave dhe të koordinojnë hapat e mëtejshëm me udhëheqësit e tyre”, ka shkruar ai, transmeton albinfo.ch.

Sipas tij, përfaqësuesit ushtarakë identifikuan çështjet për një takim të mundshëm të ardhshëm, i cili mund të zhvillohet që javën e ardhshme.

Zelensky shtoi se ka pasur mirëkuptim “të nevojës për monitorimin dhe kontroll amerikan të procesit të përfundimit të luftës dhe garantimit të sigurisë”.

Të dërguarit e SHBA-së, Steve Witkoff dhe Jared Kushner, morën pjesë së bashku me zyrtarët ukrainas, përfshirë kryenegociatorin Rustem Umerov dhe kreun e inteligjencës ushtarake, Kyrylo Budanov. Rusia dërgoi përfaqësues të inteligjencës ushtarake dhe të ushtrisë.