Autostradat zvicerane drejt zgjerimit, planet e qeverisë kundër kolonave

Rrugët në Zvicër ku qeveria planifikon të largoj bllokimet e trafikut

Zvicra po përgatitet për masa të reja infrastrukturore me qëllim uljen e bllokimeve të shpeshta të trafikut, veçanërisht në autostradat pranë qendrave urbane. Qeveria federale ka identifikuar disa segmente kritike ku do të ndërhyhet në vitet e ardhshme, përcjell albinfo.ch.

Disa autostrada në Zvicër, sidomos ato që kalojnë pranë qyteteve të mëdha, janë më të ekspozuara ndaj mbingarkesës së trafikut. Për këtë arsye, autoritetet federale kanë hartuar plane konkrete për të parandaluar kolonat e gjata dhe për të përmirësuar qarkullimin rrugor.

Sipas Departamentit Federal të Transportit, “rrjeti kombëtar i rrugëve është thelbësor për transportin e njerëzve dhe mallrave. Për të eliminuar ngushticat, për të reduktuar kohëzgjatjen e bllokimeve dhe për të shmangur trafikun devijues, përparësi do t’u jepet projekteve me përfitime të larta dhe zbatim të shpejtë”.

Zgjerimi i autostradës A1

Në fazën e parë, qeveria synon të eliminojë dy nga pikat më problematike të trafikut në autostradën A1 – autostrada më e ngarkuar në vend. Midis viteve 2027 dhe 2035, parashikohet zgjerimi në gjashtë korsi i segmentit mes Aarau-Ost dhe nyjës Birrfeld në kantonin Aargau, si dhe i pjesës Perly–Bernex në kantonin e Gjenevës.

Këto ndërhyrje pritet të lehtësojnë ndjeshëm qarkullimin në zonat më të frekuentuara dhe të reduktojnë vonesat e përditshme për mijëra drejtues mjetesh.

Masa shtesë kundër bllokimeve

Përveç zgjerimit të rrugëve, autoritetet po shqyrtojnë edhe masa alternative, si përdorimi i korsive të emergjencës në raste të caktuara, me qëllim shmangien e bllokimeve të trafikut gjatë orëve të pikut.

Qeveria zvicerane thekson se këto masa janë pjesë e një strategjie afatgjatë për të garantuar lëvizje më efikase, siguri rrugore dhe zhvillim të qëndrueshëm të infrastrukturës.

Çfarë projektesh të tjera janë planifikuar më pas?

Brenda së njëjtës periudhë kohore, autoritetet zvicerane planifikojnë të ndërhyjnë edhe në disa segmente të tjera kyçe të rrjetit kombëtar rrugor, me synimin për të përmirësuar qarkullimin dhe për të reduktuar ngarkesën e trafikut në zonat më problematike.

Projektet e parashikuara përfshijnë:

N1 – Zgjerimi në tetë korsi i segmentit Wallisellen – Brüttisellen në kantonin e Cyrihut

N1 – Ndërtimi i tunelit të tretë të Rosenbergut, së bashku me rrugën lidhëse, në St. Gallen

N2 – Ndërtimi i Tunelit të Rinit në Bazel, që lidh kantonet Basel-City dhe Basel-Country

N2 – Përmirësimi i segmentit Lugano Jug – Mendrisio, në zonën kufitare mes Ticinos dhe Italisë

N3 – Zgjerimi në gjashtë korsi i by-pass-it perëndimor të Cyrihut (Limmattal – Urdorf-South)

N4 – Ndërtimi i Tunelit Fäsenstaub në kantonin Schaffhausen

N15 – Autostrada e Oberland-it të Cyrihut, segmenti Uster Lindje – Betzholz

N23 – By-pass-i verior i Amriswil, përfshirë lidhjen me Romanshorn, në kantonin Thurgau

Këto projekte synojnë të modernizojnë infrastrukturën rrugore dhe të përshtatin rrjetin kombëtar me nevojat në rritje të trafikut, veçanërisht në zonat urbane dhe ato ndërkufitare.

Investime edhe në transportin hekurudhor

Paralelisht me projektet rrugore, qeveria federale është angazhuar gjithashtu në përmirësimin dhe zgjerimin e disa projekteve hekurudhore gjatë viteve të ardhshme. Qëllimi është të ofrohen alternativa më të qëndrueshme ndaj transportit rrugor, të lehtësohet lëvizja e pasagjerëve dhe të rritet efikasiteti i transportit të mallrave.

Autoritetet theksojnë se zhvillimi i balancuar i rrugëve dhe hekurudhave është kyç për të ardhmen e mobilitetit në Zvicër./Albinfo.ch

---