Terapia me tre barna jep rezultate premtuese kundër kancerit të pankreasit në studime eksperimentale

Një zhvillim i rëndësishëm në kërkimet për trajtimin e kancerit të pankreasit vjen nga Spanja, ku shkencëtarët kanë shënuar përparim të ndjeshëm në modelet eksperimentale.

Mariano Barbacid, drejtues i grupit të Onkologjisë Eksperimentale në Qendrën Kombëtare Spanjolle për Kërkime mbi Kancerin (CNIO), bëri të ditur se një studim i kryer te minjtë ka arritur të eliminojë qelizat kancerogjene të formës më të shpeshtë dhe më agresive të kancerit të pankreasit, të njohur si adenokarcinoma duktale pankreatike (PDAC).

Sipas rezultateve, trajtimi ka sjellë jo vetëm zhdukjen afatgjatë të tumorit, por edhe një ulje të ndjeshme të efekteve anësore, duke shënuar një kohëzgjatje të paprecedentë të kontrollit të sëmundjes.

“Për herë të parë kemi arritur një përgjigje të plotë dhe të qëndrueshme, me toksicitet minimal, kundër kancerit të pankreasit në modelet eksperimentale. Këto të dhëna sugjerojnë se terapia e kombinuar mund të ndryshojë rrënjësisht ecurinë e këtij tumori”, u shpreh Barbacid, në një konferencë për shtyp së bashku me bashkautorët e studimit Carmen Guerra, Vasiliki Liaki dhe Sara Barrambana.

Edhe pse nevojiten ende kohë dhe verifikime përpara kalimit në prova klinike te njerëzit, studiuesit theksojnë se adenokarcinoma duktale pankreatike ka pësuar regres të plotë për rreth 200 ditë në modelet shtazore, pa efekte anësore serioze, falë kombinimit të tre barnave.

Terapia e kombinuar me tre barna

Trajtimi eksperimental përfshin tre ilaçe që veprojnë mbi mekanizmat kyç të rritjes së qelizave tumorale: dy prej tyre synojnë proteinat EGFR dhe STAT3, ndërsa i treti vepron kundër onkogjenit KRAS, një faktor qendror në zhvillimin e këtij lloji kanceri, të cilin ekipi spanjoll e studion prej vitesh.

Barnat që bllokojnë KRAS-in, i cili është i mutuar në rreth 90% të rasteve të kancerit të pankreasit, kanë treguar deri më tani efektivitet të kufizuar, pasi tumori krijon rezistencë pas disa muajsh trajtim. Studimi i ri synon pikërisht tejkalimin e kësaj rezistence, duke hapur perspektiva të reja për trajtimin e një prej tumoreve më vdekjeprurëse.