Zvicra në panik: “Shqipëria po na e rrëmben Florian Kamberin”

"Florian Kamberi duhet të ftohet sa më shpejt nga përfaqësuesja e parë e Zvicrës, në të kundërtën, shqiptarët mund të na e rrëmbejnë nga duart..."

Paraqitjet e mira gjatë këtij sezoni të futbollistit shqiptar, Florian Kamberi, që luan në Gras’hoper, kanë vënë në panik zviceranët se mos po ua rrëmben kombëtarja shqiptare para se ai të aktivizohet për përfaqësuesen zvicerane.

Sulmuesi 20-vjeçar i Gras’hopersit, Florian Kamberi, është duke kaluar një sezon të shkëlqyer në ligën zvicerane.
Kamberi bëri bujë pasi shënoi golin e fitores 3-2 që Gras’hopersi arriti në derbin helvetik ndaj FC Cyrihut.

Paraqitjet e tij u kanë dhënë shkas zërave në mediet zvicerane, të cilat po frikësohen se lojtarin nga Gllogjani i Pejës mund ta rrëmbejë kombëtarja shqiptare, raporton “blick.ch”, transmeton albinfo.ch.

Gazeta zvicerane ka raportuar se Florian Kamberi duhet të ftohet sa më shpejt nga përfaqësuesja e parë e Zvicrës, në të kundërtën, shqiptarët mund ta rrëmbejnë nga duart dhe mund të zgjedhë rrugën e shumë lojtarëve shqiptarë, të cilët kanë bërë karrierë në këtë vend dhe janë bashkuar me përfaqësuesen e Shqipërisë.

Trajneri i U21 të përfaqësueses zvicerane ka thënë se Kamberi nuk është ftuar ende në përfaqësuese, për shkak të konkurrencës së madhe që është brenda ekipit, ndërsa ai shanse më të mëdha i ka dhënë talentit tjetër shqiptar në Zvicër, i cili po ashtu shënoi në këtë derbi futbollistik Shani Tarashaj. “Tarashaj e ka një përparësi më të madhe se Kamberi”, ka thënë ai.