Pse do të rriten sërish çmimet e smartfonëve?

Keystone

Çmimet e smartfonëve po shkojnë gjithnjë e më lartë.

Në vitin 2007, iPhone i parë kushtonte 370 franga. Sot, për iPhone 17 duhet të paguash gati 1,000 franga – një rritje që shihet edhe tek prodhues të tjerë, si Samsung. Arsyeja? Tregu në rritje i inteligjencës artificiale, një teknologji që do të jetë pjesë e të gjitha modeleve të ardhshme.

Lajm i keq për ata që planifikonin të blinin një telefon të avancuar këtë vit: çmimet e smartfonëve pritet të rriten sërish në 2026, me një shtesë prej 200 deri 250 frangash në faturë, transmeton albinfo.ch.

Pse po ndodh kjo?

Rritja e çmimeve lidhet me përdorimin gjithnjë e më të madh të inteligjencës artificiale. “Telefonat që do të dalin së shpejti do të kenë më shumë AI të integruar. Kjo AI kërkon më shumë memorie dhe çipe më të avancuara,” shpjegon Yhann Hamon, menaxher produktesh në Fnac Gjenevë, në emisionin e lajmeve RTS në orën 19:30.

Një treg i mbingopur me qendra të të dhënave

Tregu është plotësisht i mbingopur nga gjigantët e teknologjisë që po shumëfishojnë qendrat e të dhënave – vendet ku pajisjet kompjuterike dhe rrjetet përdoren për mbledhjen, ruajtjen dhe përpunimin e të dhënave.

Këto kompani janë duke u përpjekur të sigurojnë komponentët thelbësorë për funksionimin e inteligjencës artificiale, veçanërisht RAM dhe hapësirë ruajtjeje.

Kapaciteti i prodhimit nuk mjafton për të plotësuar nevojat e telefonave, kompjuterëve dhe qendrave të të dhënave në të njëjtën kohë. “Pasi vlera e shtuar është më e madhe për qendrat e të dhënave, këto produkte i japin prioritet qendrave të të dhënave, duke krijuar mungesë për pajisjet e tjera elektronike,” shpjegon Jean-Christophe Eloy, president i Yole Group, një kompani kërkimore e tregut.

Rritja e çmimeve pritet të zgjasë të paktën dy vite, derisa të ndërtohen kapacitetet e reja të prodhimit. Kjo ndikon jo vetëm te smartfonët, por edhe te kompjuterët dhe tabletët.