Bllokohen pasagjerët e metrosë M2 në Lozanë

Pasagjerët në metron M2 në Lozanë u bllokuan për disa minuta të enjten rreth orës 17:15 për shkak të një ndërprerjeje të energjisë. Ata janë evakuuar më pas. Linja është ndërprerë dhe ka rifilluar shërbimin rreth orës 23:00, ka bërë të ditur transporti publik në Lausanne.

Stafi ka evakuar përdoruesit, të cilët kanë ecur në tunel deri te stacioni tjetër. Disa prej pasagjerëve kanë pohuar se kanë qëndruar brenda tunelit afro 30 minuta. Zyrtarët e rrjetit kanë thënë se e gjithë kjo ka zgjatur 15 minuta.

Në fillim të muajit korrik, metroja M2 nëntokësore kishte pësuar një ndërprerje të madhe, me një ndërprerje totale të trafikut. Një qark i shkurtër ishte shkaku i problemeve.