Kuvendi i Kosovës sonte me seancë të jashtëzakonshme, ja çka do të diskutohet

Kryetarja e Kuvendit të Kosovës, Albulena Haxhiu pas mbledhjes së Kryesisë së Kuvendit ka njoftuar që sonte do të mbahet seanca e jashtëzakonshme, me fillim nga ora 19:00.

“Kuvendi i Kosovës pas miratimit të seancës së jashtëzakonshme që do të mbahet sot në orën 19:00, ku do t’i ketë 16 komisione parlamentare, katër komisione të përhershme, 12 komisione me nga 11 anëtarë. Natyrisht do të njoftoheni se kush kryeson dhe kush do të kryesojë këto komisione parlamentare, por ajo që është e rëndësishme është se Vetëvendosje do të kryesojë 9 komisione, PDK tri, LDK dy, Lista Serbe një dhe Grupi multietnik do ta kryesojë një komision”, ka deklaruar ajo, transmeton albinfo.ch.

Tutje, ajo ka deklaruar se kanë miratuar që të trajtohet kërkesa e Qeverisë për ndarjen buxhetore për muajin mars 1/12-ta sipas Ligjit të Qeverisë dhe në anën tjetër rregulloren e punës së Qeverisë.

“Çështja tjetër ndërlidhet me procesin e padrejtë në Hagë ndaj ish krerëve të UÇK-së. Sipas diskutimeve ka vullnet nga grupet parlamentare që kjo rezolutë ta marrë mbështetjen e Kuvendit. Do të ketë paraprakisht një takim me përfaqësuesit e grupeve parlamentare”, u shpreh Haxhiu.