Nis zbatimi i marrëveshjes për policat e sigurimit

Sipas marrëveshjes, serbët në Kosovë hyjnë me Kartonin e Gjelbër ndërsa kosovarët në Serbi me sigurimin "TPL plus" që kushton 40 euro për një vit

Nga mesnata ka filluar të zbatohet Marrëveshja për njohjen reciproke të policave të sigurimit kufitar ndërmjet Kosovës dhe Serbisë, duke shënuar kështu hapin e parë të lëvizjes pa pagesë ekstra, për automjetet e dyanshme. Sipas marrëveshjes, serbët në Kosovë hyjnë me Kartonin e Gjelbër ndërsa kosovarët me sigurimin TPL plus.

Marrëveshja për policat kufitare është arritur më 24 korrik, ndërsa pas dështimeve të disahershme, nisi të zbatohet në mesnatë.

Sigurimi TPL plus do të kushtojë 40 euro për një vit, ndërsa do të vlejë edhe për Maqedoninë dhe Shqipërinë. Sipas kësaj marrëveshje, automjetet me tabela RKS do të mund të udhëtojnë në Serbi, por vetëm duke i zëvendësuar ato me tabela Provuese (Probna tabla).

Dalibor Jevtiq, ministër për Kthim në Qeverinë e Kosovës ka thënë se kjo marrëveshja është marrëveshje për të cilën kanë qenë më të interesuar qytetarët serbë të Kosovës. Sipas ti, arsyeja e saj është në radhë të parë ekonomike, raporton Koha.

Deri tash qytetarët e Kosovës kanë paguar nga 100 euro për sigurimin njëmujor të automjeteve, kurse për hyrjen dyjavore në Kosovë është bërë pagesa prej 40 eurosh.