Çmimi i naftës në Austri afër nivelit të Kosovës

Nafta drejt 2 euro në Austri, qytetarët “ikën” për furnizim në Slloveni

Rritja e çmimeve të karburanteve në Evropë po krijon fenomene të reja ekonomike, ndër to edhe të ashtuquajturin “turizëm karburanti”. Ky trend është veçanërisht i dukshëm në Slloveni, ku çmimet e rregulluara nga shteti janë më të ulëta krahasuar me vendet fqinje, raporton BBC, përcjell albinfo.ch.

Si rezultat, shumë shoferë nga Austri po kalojnë kufirin për t’u furnizuar me karburant më të lirë. Për të menaxhuar këtë fluks, autoritetet sllovene kanë vendosur kufizime, drejtuesit privatë mund të blejnë deri në 50 litra në ditë, ndërsa bizneset dhe fermerët deri në 200 litra.

Qeveria gjithashtu ka inkurajuar operatorët e tregut që të aplikojnë masa më të rrepta për klientët e huaj, në mënyrë që të shmangen mungesat për konsumatorët vendas.

Ndërkohë, çmimet në Austri kanë arritur nivele të larta. Një litër benzinë Euro-super 95 po i afrohet 1.80 eurove, ndërsa dizeli (nafta) është pranë 2.00 eurove për litër,  pothuajse në të njëjtin nivel me çmimet aktuale në Kosovë, ku çmimi për litër naftë është 1.79-1.80 €, përcjell tutje albinfo.ch.

Në kontrast, në Slloveni çmimet mbeten të kontrolluara, me benzinën që shitet rreth 1.47 euro për litër dhe dizelin rreth 1.53 euro.

Ky dallim ka nxitur një lëvizje të shtuar ndërkufitare. Ndërsa disa qytetarë sllovenë e shohin këtë si një bezdi për shkak të radhëve dhe mundësisë së mungesave, të tjerë e konsiderojnë një mundësi ekonomike. Shumë nga këta “turistë të karburantit” nuk kufizohen vetëm në furnizim, por kalojnë kohë në Slloveni, duke konsumuar në restorante dhe duke bërë blerje në dyqanet lokale.

Për aq kohë sa dallimet në çmime do të vazhdojnë, edhe fenomeni i “turizmit të karburantit” pritet të mbetet prezent në rajon./Albinfo.ch

---