Dyfishohen viktimat nga ortekët në Evropë: mbi 130 të vdekur këtë dimër

Italia është vendi më i goditur, me 38 viktima, e ndjekur nga Franca me 32 dhe Austria me 30 të vdekur

Numri i viktimave nga ortekët në Evropë është dyfishuar këtë dimër, duke arritur në 136 persona të vdekur në Alpe dhe zona të tjera malore.

Sipas të dhënave nga shërbimet evropiane të paralajmërimit për ortekë, ky numër është pothuajse dy herë më i lartë krahasuar me dimrin e kaluar, kur u regjistruan rreth 70 viktima.

Italia është vendi më i goditur, me 38 viktima, e ndjekur nga Franca me 32 dhe Austria me 30 të vdekur, transmeton albinfo.ch.

Ky është një nga sezonet më tragjike në vitet e fundit, ndërsa për të gjetur një bilanc më të rëndë duhet të kthehemi në dimrin 2017/2018, kur u regjistruan 147 viktima.

Ekspertët theksojnë se kushtet e paqëndrueshme të dëborës dhe shtresat e dobëta kanë rritur ndjeshëm rrezikun e ortekëve në të gjithë rajonin alpin.

---