Gjermani: Arrestohet një  çift nën dyshimin për spiunazh për Kinën

@unsplash

Policia gjermane ka arrestuar një çift të martuar në Mynih nën dyshimin se kanë spiunuar për llogari të Kinës dhe kanë kërkuar informacione mbi teknologji të avancuara me përdorim ushtarak, ka njoftuar prokuroria federale.

Të dy të arrestuarit, shtetas gjermanë të identifikuar pjesërisht si Xuejun C. dhe Hua S., dyshohet se kanë vepruar në emër të një agjencie kineze të inteligjencës. Autoritetet kanë kontrolluar banesat dhe vendet e tyre të punës.

Sipas hetuesve, çifti kishte krijuar kontakte me akademikë në universitete dhe institucione kërkimore gjermane, veçanërisht në fushat e inxhinierisë ajrore, shkencave kompjuterike dhe inteligjencës artificiale. Ata dyshohet se janë paraqitur si përkthyes ose punonjës të një kompanie automobilistike për të ndërtuar këto kontakte.

Prokuroria pretendon se disa shkencëtarë janë dërguar në Kinë me pretekstin e ligjëratave të paguara, por më pas kanë folur para punonjësve të industrisë ushtarake shtetërore, transmeton albinfo.ch.

Ndërkohë, autoritetet po zhvillojnë masa hetimore edhe ndaj 10 personave të tjerë në disa qytete të Gjermanisë, të cilët konsiderohen dëshmitarë dhe jo të dyshuar.
Rasti vjen në një periudhë kur në Gjermani janë raportuar disa çështje të tjera spiunazhi të lidhura me Kinën, ndërsa zyrtarë gjermanë kanë paralajmëruar për rritje të aktivitetit të inteligjencës kineze në Evropë.