Trump pas kontrolleve mjekësore: “Rezultatet perfekte”

Keystone (AP Photo/Evan Vucci)

Presidenti i Shteteve të Bashkuara, Donald Trump, ka deklaruar se rezultatet e ekzaminimit të tij të fundit mjekësor kanë qenë “perfekte”. Kontrolli u zhvillua gjatë një vizite mbi treorëshe në Qendrën Kombëtare Mjekësore Ushtarake Walter Reed, ku ai iu nënshtrua kontrolleve rutinë vjetore parandaluese, përfshirë ato mjekësore dhe dentare, sipas AP.

Shtëpia e Bardhë bëri të ditur se presidenti u kthye menjëherë në rezidencën presidenciale pas përfundimit të vizitës, ndërsa rezultatet zyrtare të kontrollit nuk u publikuan menjëherë.

Ky është ekzaminimi i katërt mjekësor i bërë publik që prej rikthimit të tij në detyrë për mandatin e dytë.

Trump e përshkroi vizitën si një “kontroll fizik gjashtëmujor”, duke falënderuar mjekët dhe stafin e Qendrës Mjekësore Ushtarake Walter Reed, dhe duke theksuar se gjithçka kishte shkuar “perfekt”.