AGROKOS & EXPOKOS 2026 në Prishtinë: 68 biznese dhe fokus i veçantë në ‘Made in Kosova’

Me tingujt e muzikës tradicionale dhe performancat e ansamblit nga Pogradeci, është hapur në Prishtinë edicioni 2026 i panairit AGROKOS & EXPOKOS, një ngjarje që solli atmosferë kulturore dhe promovim të bashkëpunimit ekonomik rajonal.

Ky panair me traditë 26-vjeçare po shërben si një platformë e rëndësishme për lidhjen e bizneseve nga Kosova, Shqipëria, Mali i Zi, Bosnja dhe Hercegovina, si dhe vende të tjera të rajonit. Përmes tij synohet promovimi i produkteve vendore, rritja e investimeve dhe forcimi i rrjetëzimit mes ndërmarrjeve.

Në edicionin e këtij viti marrin pjesë 68 biznese, prej të cilave 30 vijnë nga shtetet e rajonit. Paralelisht janë organizuar 128 takime B2B, të cilat po krijojnë mundësi të reja për partneritete, shkëmbim përvojash dhe zhvillim të bashkëpunimeve afariste.

Organizatorët dhe institucionet mbështetëse theksojnë se përmes politikave të zhvillimit ekonomik, granteve për prodhim, digjitalizim, inovacion dhe certifikim, si dhe investimeve në parqe industriale të gjelbra, synohet forcimi i kapaciteteve prodhuese dhe eksportuese të ndërmarrjeve vendore. Qëllimi mbetet rritja e konkurrueshmërisë së produkteve të Kosovës në tregjet ndërkombëtare dhe fuqizimi i brendit “Made in Kosovo”.

Panairi AGROKOS & EXPOKOS vazhdon të vlerësohet si një ngjarje kyçe për zhvillimin ekonomik, duke nxitur bashkëpunimin rajonal dhe duke krijuar mundësi të reja për bizneset dhe ekonominë e vendit.