Franca bëhet vendi i parë në Evropë që rimburson barnat për humbje peshe

Obese 12 year old boy measuring himself

Franca do të fillojë të rimbursojë barnat për humbje peshe, si Wegovy dhe Mounjaro, nga data 15 qershor, ka njoftuar ministrja e Shëndetësisë Stéphanie Rist.

Me këtë vendim, Franca bëhet vendi i parë në Evropë që mbulon kostot e këtyre barnave përmes sistemit publik të sigurimeve shëndetësore.

“Jam shumë krenare, sepse jemi vendi i parë në Bashkimin Evropian që ofrojmë rimbursim të plotë dhe të përhershëm përmes mbulimit standard,” tha Rist në një intervistë televizive.

Sipas saj, rimbursimi zyrtar do të jetë 65%, por në praktikë pothuajse të gjithë pacientët do të mbulohen plotësisht, pasi shumica prej tyre kanë sëmundje shoqëruese si hipertensioni apo diabeti. Kjo do të thotë se për pjesën dërrmuese të pacientëve, trajtimi do të jetë i rimbursuar 100%.

Barnat Wegovy, i prodhuar nga kompania daneze Novo Nordisk, dhe Mounjaro i kompanisë Eli Lilly, i përkasin një gjenerate të re ilaçesh për humbje peshe.

Të njohura si agonistë të receptorëve GLP-1 (glucagon-like peptide-1), këto ilaçe ndihmojnë në uljen e peshës duke imituar një hormon që redukton oreksin, transmeton albinfo.ch.

Sipas vlerësimeve, deri në fund të janarit mbi 70,000 pacientë në Francë po trajtoheshin me Mounjaro.

Megjithatë, çmimet e larta kanë qenë një pengesë e madhe për aksesin në këto trajtime në mbarë botën. Në Francë, pacientët aktualisht paguajnë rreth 300 euro në muaj për injeksionet.

Këto terapi janë të disponueshme me recetë në Francë që nga viti 2024, por deri tani nuk ishin të përfshira në skemën e rimbursimit të sigurimeve shëndetësore.

Në qershor të vitit 2025, Franca lejoi që këto barna të përshkruhen nga të gjithë mjekët, jo vetëm nga specialistët si endokrinologët.

Sipas Anketës Kombëtare Epidemiologjike për Mbipeshën dhe Obezitetin 2024, rreth 18% e popullsisë franceze (afërsisht 10 milionë njerëz) janë obezë.

Në nivel të Bashkimit Evropian, vlerësohet se 51% e popullsisë mbi 16 vjeç është mbipeshë dhe 17% është obezë, sipas të dhënave të Parlamentit Evropian.