Vazhdojnë protestat në Tiranë, kërkohet anulimi i projektit të Zvërnecit

Ka përfunduar grumbullimi përpara ndërtesës së Kryeministrisë së Shqipërisë, por revolta qytetare e kësaj mbrëmjeje nuk ndalet këtu.

Menjëherë pas fjalimeve të forta të mbajtura në podium, mijëra protestuesit kanë nisur marshimin nëpër rrugët kryesore të kryeqytetit, transmeton albinfo.ch.

Në ditët e kaluara të kësaj proteste, qytetarët kanë zgjedhur të vijojnë tubimin duke lëvizur në formë marshimi, duke paralizuar përkohësisht qarkullimin në disa prej akseve kyçe të Tiranës.

Me dritat e telefonave ende të ndezura dhe nën tingujt e këngës “Dua më shumë Shqipërinë”, turma po marshon në bulevardin “Dëshmorët e Kombit”.

Ndërsa pritet që ditët në vijim numri i tyre të rritet, aktivistët lajmëruan se nesër do jenë të pranishëm edhe studentët nga diaspora.

Ata kanë paraqitur edhe më herë pesë kërkesa: Dorëheqjen e qeverisë; Shfuqizimin e statusit dhe të kuadrit ligjor që lidhet me investitorët strategjikë;  Shfuqizimin e Paketës së Maleve;  Anulimin e ndryshimeve në Ligjin për Zonat e Mbrojtura;  Anulimin e ndryshimeve në Ligjin për Trashëgiminë Kulturore.