Në SHBA hapet ekspozita “Liria” e fotografit kosovar Hazir Reka

Ekspozita e organizuar nga Ambasada e Kosovës në Uashington sjell fotografi që pasqyrojnë sakrificën, rezistencën dhe rrugëtimin e vendit drejt lirisë

Në kuadër të aktiviteteve për shënimin e Ditës së Çlirimit të Kosovës, Ambasada e Republikës së Kosovës në Shtetet e Bashkuara të Amerikës ka hapur ekspozitën “Liria” të fotografit të njohur kosovar, Hazir Reka, përcjell albinfo.ch.

Ekspozita paraqet një koleksion fotografish që dokumentojnë momente të rëndësishme nga historia e Kosovës, duke pasqyruar sakrificën, qëndresën dhe shpresën e popullit të saj, si dhe mbështetjen e vazhdueshme të Shteteve të Bashkuara në rrugën drejt lirisë dhe pavarësisë.

Ambasadori i Kosovës në SHBA, Ilir Dugolli, e vlerësoi Hazir Rekën si “kronistin jozyrtar të historisë moderne të Kosovës”, duke theksuar se objektivi i tij ka fiksuar ngjarjet më të rëndësishme nga periudha e represionit, rezistencës paqësore, luftës, çlirimit dhe shtetndërtimit.

Sipas Dugollit, ekspozita përfaqëson një dëshmi të çmuar vizuale të historisë së Kosovës dhe të miqësisë së veçantë ndërmjet Kosovës dhe Shteteve të Bashkuara të Amerikës./Albinfo.ch

---