Filmi i Visar Morinës fiton Çmimin “CineMasters” në Festivalin e Mynihut

Juria ndërkombëtare, e zgjodhi filmin nga dymbëdhjetë pjesëmarrësit në konkursin CineMasters

Në festivalin e Filmit në Mynih i cili ka përfunduar dje, më 4 korrik, njërin ndër çmimet e rëndësishme e ka fituar regjisori nga Kosova, i cili jeton dhe krijon në Gjermani, Visar Morina. Filmi i tij “Of Shame and Money” ka subjekt nga Kosova, shkruan albinfo.ch.

Çmimi CineMasters për Filmin më të Mirë Ndërkombëtar shkoi për “Of Shame and Money” nga Visar Morina. Juria ndërkombëtare, e përbërë nga aktorja Ella Rumpf dhe regjisorët Michael Kofler dhe Pete Ohs, e zgjodhi filmin nga dymbëdhjetë pjesëmarrësit në konkursin CineMasters. Çmimi, i sponsorizuar për herë të parë nga Messe München, është i dhuruar me 10,000 €, shkruan filmstiftung.de.

Shame and Money është një film i zhanrit dramë i vitit 2026 me regji nga Visar Morina dhe me skenar të përbashkët nga Doruntina Basha. Në të luajnë Astrit Kabashi, Flonja Kodheli, Kumrije Hoxha, Fiona Gllavica dhe Alban Ukaj.

Subjekti: Një burrë krenar për familjen përpiqet të sigurojë jetesën derisa shtohen presionet financiare. Edhe pse nëna dhe kunati i tij ofrojnë ndihmë, pranimi i mbështetjes ia lëndon dinjitetin. Përderisa humb stabiliteti, ai përballet me zgjedhje të vështira midis krenarisë dhe mbijetesës.

Në Shame and Money, Visar Morina tregon historinë e një familjeje në Kosovë, pjesëtarët e së cilës, pasi humbasin jetesën e tyre ekonomike, detyrohen të shpërngulen në qytetin e madh dhe përballen me sfidat e një shoqërie gjithnjë e më kapitaliste.

---