Kush është shqiptari që ishte pjesë e triumfit të Spanjës në Botërorin 2026?

Kush është shqiptari që qëndron pas organizimit të Botërorit 2030 dhe festoi titullin me Spanjën?

Bëhet fjalë për Eduard Dervishajn. Ai vazhdon të shkruajë histori si një nga shqiptarët më të suksesshëm në administrimin e futbollit evropian. Me një karrierë të gjatë në Federatën Mbretërore Spanjolle të Futbollit, ai ishte pjesë e delegacionit të kombëtares së Spanjës, e cila u shpall kampione e Kupës së Botës 2026, transmeton albinfo.ch.

I lindur dhe i rritur në Tiranë, Dervishaj jeton në Spanjë që nga viti 1997. Gjatë viteve ka mbajtur poste të rëndësishme në federatën spanjolle, deri në pozitën e zëvendëssekretarit, ndërsa aktualisht ushtron detyrën e drejtorit të Departamentit Ndërkombëtar dhe Operacioneve.

Pas triumfit të Spanjës në Botëror, 65-vjeçari publikoi në rrjetet sociale fotografi me trofeun e Kupës së Botës dhe trajnerin Luis de la Fuente, duke shprehur mirënjohjen për të gjithë ata që kontribuuan në këtë sukses. Ai theksoi se pati privilegjin të ishte pjesë e Botërorit të tij të dytë.

Karriera e Dervishajt përfshin edhe organizimin e katër finaleve të Ligës së Kampionëve, ndërsa vitin e kaluar ai u emërua drejtues i projektit organizativ të Kupës së Botës 2030, që do të organizohet nga Spanja, Portugalia dhe Maroku.

Para se të ndërtonte karrierën e tij në Spanjë, Eduard Dervishaj dha një kontribut të rëndësishëm edhe në futbollin shqiptar. Ai ishte sekretar i përgjithshëm i Federatës Shqiptare të Futbollit në periudhën 1992–1996, ndërsa më herët ka punuar edhe si trajner i Dinamos së Tiranës.

Suksesi i tij përbën një tjetër histori frymëzuese të shqiptarëve që kanë arritur të zënë role të rëndësishme në institucionet më prestigjioze të futbollit ndërkombëtar. /Albinfo.ch

---