Mbyllet pas 70 vitesh fabrika e fundit e kravatave në Zvicër

Fabrika quhet Bachmann Krawatten AG dhe ndodhet në Cyrih. Ajo konsiderohej prodhuesi i fundit i kravatave në Zvicër.

Zvicra ka humbur një tjetër simbol të industrisë së saj tradicionale. Fabrika e fundit në vend që prodhonte kravata ka njoftuar mbylljen e aktivitetit pas më shumë se shtatë dekadash pune, përcjell albinfo.ch.

Kompania, e cila prej vitesh prodhonte kravata me cilësi të lartë për tregun zviceran dhe atë ndërkombëtar, nuk ka arritur t’i rezistojë ndryshimeve në modë dhe rënies së kërkesës. Përdorimi gjithnjë e më i rrallë i kravatës në jetën e përditshme dhe në ambientet e punës ka ndikuar drejtpërdrejt në uljen e shitjeve.

Drejtuesit e kompanisë thonë se për vite me radhë janë përpjekur ta mbajnë prodhimin në Zvicër, duke u fokusuar te cilësia dhe punimi artizanal. Megjithatë, kostot e larta të prodhimit dhe ndryshimi i preferencave të konsumatorëve e kanë bërë të pamundur vazhdimin e aktivitetit.

Me mbylljen e kësaj fabrike përfundon një kapitull i rëndësishëm i industrisë tekstile zvicerane, e njohur dikur për prodhimin e aksesorëve të luksit dhe mjeshtërinë tradicionale.

---