A e ka ndaluar vërtet Zvicra mamografinë?

Sipas thashethemeve që qarkullojnë në mediat sociale, Ministria e Shëndetësisë e Zvicrës ka ndaluar bërjen e mamografisë për kancerin e gjirit, përcjell albinfo.ch.

Arsyet e supozuara për këtë lëvizje përfshijnë shqetësimet për sigurinë. “Një nga pretendimet më të shpeshta është se mamografia shkakton kancer gjiri për shkak të ekspozimit të pacientit ndaj rrezatimit gjatë procesit të shqyrtimit”, siç raportohet nga Euronews.

Nëse ndodh që të hasni në postime të tilla, dijeni se janë të rreme.

Platforma e lajmeve iu drejtua Zyrës Federale Zvicerane të Shëndetit Publik (FOPH), e cila konfirmoi se nuk ka asnjë ndalim për mamografinë në Zvicër.

Sa i përket rreziqeve të supozuara shëndetësore, Julia Schwarz, një specialiste e zbulimit të hershëm në Ligën Zvicerane të Kancerit në Bernë, tha se ka disa raste “ku një stjuardesë merr më shumë rrezatim sesa merrni me një mamografi”.