A mund të kalojnë britanikët tranzit përmes Francës në Zvicër?

Franca ka rregulla strikte që ndalojnë shumicën e llojeve të udhëtimit nga Mbretëria e Bashkuar - por çfarë ndodh me njerëzit që duhet të kalojnë nëpër Francë për të shkuar në një vend tjetër?

U raportua të enjten se shtetasve të Mbretërisë së Bashkuar u ndalohet të udhëtojnë nëpër Francë – edhe nëse jetojnë në një vend tjetër të BE-së dhe duhet të kthehen në shtëpi.

Megjithatë, situata duket të jetë pak më e ndërlikuar se kaq, shkruan The Local, përcjell albinfo.ch.

Që nga 18 dhjetori, Franca ka vendosur rregulla strikte për udhëtimet drejt dhe nga MB, ku lejohen vetëm ata që plotësojnë kriteret për udhëtime thelbësore.

Shtetasit e Mbretërisë së Bashkuar që jetojnë në Francë lejohen të kthehen në shtëpi.

Gjithashtu lejohen “shtetasit e BE-së që kanë shtëpinë e tyre kryesore në Francë ose . . . në tranzit përmes Francës për në shtëpinë e tyre kryesore në një vend të BE-së”.

Që nga Brexit, kjo sigurisht që nuk përfshin më britanikët që jetojnë në vendet e BE-së dhe vendet e Shengenit si Zvicra.

Megjithatë, lejohen të udhëtojnë edhe “shtetasit e Mbretërisë së Bashkuar që përfitojnë nga Marrëveshja e Tërheqjes së Brexit” (dmth ata që kanë jetuar në një vend të BE-së para 31 dhjetorit 2020) pa përmendur që duhet të jenë rezidentë të përhershëm në Francë.

Rregullat gjithashtu lejojnë “udhëtarët në tranzit për më pak se 24 orë në një zonë ndërkombëtare”.

Pra, duket se britanikët mund të kalojnë tranzit përmes Francës, përcjell tutje albinfo.ch.

Megjithatë, duket se ka një paralajmërim të rëndësishëm – se si udhëtoni.

Klauzola e tranzitit përfundon me “në një zonë ndërkombëtare” – që i referohet aeroporteve – pasagjerët në fluturimet tranzit nuk largohen nga zona ndërkombëtare e aeroportit dhe për rrjedhojë në aspektin e imigracionit nuk hyjnë në një vend.

Ambasada Britanike në Francë thotë se: “Shtetasit e Mbretërisë së Bashkuar mund të kalojnë transit nga Franca vetëm nëse udhëtojnë me ajër”.

Rregullat e plota shprehin: “Çfarëdo kombësie qofshin, ju jeni të autorizuar të kaloni tranzit përmes Francës, në zonën ndërkombëtare të një aeroporti (lidhje ndërmjet 2 fluturimeve) për një maksimum prej 24 orësh.

“Nëse jeni shtetas i Bashkimit Evropian, jeni i autorizuar të ktheheni në vendbanimin tuaj kryesor në Francë ose në një vend tjetër të Bashkimit Evropian. Bashkëshorti juaj (i martuar, partneri civil, partneri bashkëjetues) dhe fëmijët lejohen të udhëtojnë me ju, pavarësisht nga kombësia e tyre. Ju duhet të jeni në gjendje të tregoni dëshminë e vendbanimit tuaj kryesor në kufi.”

Pra, duket se britanikët mund të udhëtojnë nëpër Francë – por vetëm me ajër.

Ky duhet të jetë gjithashtu një fluturim transit – dmth. dy fluturime të rezervuara së bashku në mënyrë që të qëndroni brenda zonës ndërkombëtare në aeroport.

Nuk ka pasur asnjë ndryshim në rregullat që nga 18 dhjetori, por raportimi të enjten duket se është nxitur nga një cicërimë nga Eurotunnel duke thënë se britanikët nuk mund të kalojnë tranzit me rrugë – gjë që do të zbatohej për të gjithë pasagjerët e Eurotunnel.

 

---