A mund të përdoret AI në psikoterapi?

(KEYSTONE/DPA/Hannes P Albert)

Ndërsa mungesa e terapistëve në Zvicër po bëhet gjithnjë e më shqetësuese, inteligjenca artificiale (AI) po shihet si një mjet mbështetës në fushën e shëndetit mendor, veçanërisht për të rinjtë. Chatbot-et si ChatGPT ofrojnë akses të shpejtë dhe të lirë në ndihmë, duke krijuar mundësi për mbështetje kur ndihma profesionale mungon, shkruan SRF.

Ekspertët, si Sang-Il Kim dhe Gregor Berger, pranojnë përfitimet e mundshme të AI në terapi si mjet ndihmës, për shembull në përforcimin e terapive në shtëpi ose në aktivizimin e pacientëve me depresion. Po ashtu, AI mund të ndihmojë në diagnostikimin e hershëm të problemeve të shëndetit mendor në të ardhmen, përmes analizës së shprehjeve ose të folurit, transmeton albinfo.ch.

Megjithatë, ekspertët paralajmërojnë për rreziqe serioze nëse AI përdoret si zëvendësim për terapinë profesionale. Chatbot-et mund të japin informacion të gabuar ose të thellojnë izolimin social, duke përkeqësuar simptomat. Për më tepër, mungojnë standardet dhe rregulloret për cilësinë dhe sigurinë në përdorimin e AI në këtë fushë.

AI nuk është një zëvendësim për terapistët, por mund të shërbejë si mbështetje e vlefshme, nëse përdoret me kujdes dhe në përputhje me rregullat e duhur, transmeton albinfo.ch.