Punëdhënësi nuk mund ta kushtëzojë kohën tuaj të lirë

Me kufizimet që u rikthyen përsëri në Zvicër, “The Local” bisedoi me një eksperte ligjore për të zbuluar nëse shefi juaj mund të ndërmarrë veprime nëse merrni pjesë në një klub nate, protestë ose nëse udhëtoni në një zonë me rrezik të lartë.

Ne biseduam me avokaten me qendër në Gjenevë, Renuka Cavadini, nga “Page & Partners” për të diskutuar të drejtat tuaja në punë gjatë pandemisë së koronavirusit, përcjell albinfo.ch.

Që nga fillimi i korrikut, disa shpërthime në klubet e natës në Zvicër kanë hedhur dyshime në rrjedhën e veprimeve të ndërmarra nga qeveria në zbutjen e masave të bllokimit të koronavirusit.

Siç është raportuar nga media zvicerane “20 Minuta” më 7 korrik, disa punonjës në Zvicër janë të shqetësuar që shefi i tyre mund të ndërmarrë veprime nëse marrin pjesë në një klub nate, shkojnë në protestë ose bëjnë pushime në një zonë që konsiderohet ‘rrezik i lartë’.

Ne gjithashtu donim të dinim nëse një shef mund të largojë në mënyrë të ligjshme dikë për mos veshjen e maskës, shkruan tutje The Local, përcjell albinfo.ch.

Por a mundet që shefi juaj t’ ju pengojë të përfshiheni në aktivitete “të rrezikshme” në jetën tuaj private?

The Local: A është e mundur që punëdhënësi juaj të ndërmarrë masa kundër jush në Zvicër nëse shkoni në një klub nate ose nëse refuzoni të vishni maskë?

Renuka Cavadini nga Page & Partnerët: Punëdhënësi juaj nuk mund t’ju tregojë se si ta kaloni kohën tuaj të lirë.

Veshja e maskës në punë kërkohet vetëm nëse lloji i profesionit që keni (p.sh. parukier) kërkon veshjen e detyrueshme të një maske ose nëse punëdhënësi juaj e ka imponuar atë që të respektojë rekomandimet e Zyrës Federale të Shëndetit Publik.

Forca Kombëtare e ka rekomanduar shmangien e klubeve të natës si burim infeksioni. Sidoqoftë, punëdhënësi nuk ka të drejtë t’i tregojë punonjësit se çfarë të bëjë në kohën e tij/saj të lirë.

Në mënyrë që një punëdhënës të jetë në gjendje të ndërpresë kontratën për një punonjës, për shkak të përhapjes së Covid në një klub nate, duhet të provohet nga punëdhënësi, që punonjësi ishte i pakujdesshëm dhe u infektua në një klub nate dhe jo në një restorant apo në transportin publik.

Ndalimi i punonjësve për të marrë pjesë në një protestë do të ishte në kundërshtim me ligjin zviceran, përcjell tutje albinfo.ch.

Po sikur të planifikoni të udhëtoni në një rajon me rrezik të lartë si Suedia?

Punëdhënësi nuk mund t’ ju ndalojë të udhëtoni në pushimet tuaja, por nëse udhëtoni dhe nuk mund të ktheheni përsëri në punë pa përfshirë karantinën, punëdhënësi nuk ka nevojë të vazhdojë të paguajë pagën tuaj.

Cavadini gjithashtu shtroi çështjen se çfarë ndodh nëse detyroheni të karantinoheni gjatë kthimit tuaj në Zvicër.

Praktikisht kjo do të thotë që në varësi të situatës së pandemisë, rregulli i karantinës brenda vendeve mund të ndryshojë gjatë pushimeve të verës.

Nëse jeni i punësuar dhe nuk jeni në gjendje të ktheheni në Zvicër ose vendoseni në karantinë gjatë kthimit tuaj, duke ju penguar të ktheheni në punë, mungesa juaj nuk do të shfajësohet.

Prandaj, punëdhënësi do të ketë të drejtë të mos paguajë pagën tuaj gjatë këtyre ditëve të mungesës.

---