A po zbehet mbështetja për refugjatët ukrainas?

Zyrtarët e Bashkimit Evropian kanë shprehur shqetësimin se mbështetja për refugjatët ukrainas mund të zbehet për shkak të ngadalësimit ekonomik, shkruan Radio Evropa e Lirë.

Kjo vjen për shkak që ky ngadalësim prek sidomos familjet e varfra dhe po ashtu për shkak të ndikimit të propagandës ruse.

Komisionarja për Çështje të Brendshme e BE-së, Ylva Johansson, tha se mbështetja për 4 milionë refugjatë ukrainas është e qëndrueshme, por ajo shtoi se në një raport të posaçëm është shfaqur, siç tha ajo, ‘lodhje e solidaritetit’, përcjell albinfo.ch.

“Kriza e kostos së jetesës ka nisur të prekë familjet me të ardhura mesatare dhe të ulëta në shoqëritë që kanë pranuar refugjatët, ku propagada ruse mund të jetë më e suksesshme”, tha në raport këshilltari i BE-së për Ukrainën, Lodewijk Asscher.

Mes tjerash u tha që propaganda ruse mund të ndikojë në këtë aspekt. “Presidenti rus, Vladimir Putin, ka interes të madh që të ndikojë në opinionin publik lidhur me personat që janë larguar nga Ukraina. Diskursi për refugjatët mund të përdoret si armë për të krijuar ndarje brenda BE-së”, tha Asscher, duke nënvizuar një rritje të fushatave dezinformuese, shkruan REL.

Komisionarja Johansson tha se kjo ishte lëvizja më e madhe e refugjatëve në Evropë që nga Lufta e Dytë Botërore.

Në BE aplikohet direktiva për mbrojtje të përkohshme që mundëson që ukrainasit të strehohen dhe të marrin ndihmë tjetër, përcjell albinfo.ch.

---