Aksident i rëndë në Maqedoninë e Veriut: katër të vdekur pas përplasjes mes veturës dhe kamionit

BMW përfshihet nga flakët pas goditjes në qarkoren Radishan–Prishtinë–Mirkovcë, kamioni me targa të Kosovës del nga rruga

Katër persona kanë humbur jetën në një aksident të rëndë trafiku që ka ndodhur në qarkoren Radishan–Prishtinë–Mirkovcë në Maqedoninë e Veriut, ku janë përfshirë një veturë e tipit BMW dhe një kamion me targa të Kosovës, përcjell albinfo.ch.

Sipas raportimeve të mediave lokale, përplasja ka qenë jashtëzakonisht e fuqishme, ndërsa menjëherë pas goditjes vetura BMW është përfshirë nga flakët. Si pasojë, katër personat që ndodheshin brenda saj kanë humbur jetën në vendin e ngjarjes.

“Përplasja ka qenë tepër e fortë, duke bërë që automjeti BMW të përfshihet menjëherë nga flakët. Katër personat që ndodheshin brenda veturës nuk kanë arritur të shpëtojnë”, raportojnë mediat.

Nga goditja e fuqishme, edhe kamioni me targa të Kosovës ka dalë jashtë rrugës dhe është ndalur pranë anës së qarkores. Deri më tani nuk ka të dhëna të plota lidhur me gjendjen e drejtuesit të kamionit apo identitetin e viktimave.

Në vendngjarje kanë dalë njësi të shumta policore, zjarrfikës dhe ekipe emergjente, ndërsa autoritetet kanë nisur hetimet për të sqaruar shkaqet dhe rrethanat e aksidentit tragjik./Albinfo.ch

---