Aktorja Myrvete Kurtishi, laureate e çmimit për Vepër Jetësore

“Falënderoj edhe publikun tim, i cili më ka rritur, më ka krijuar, më ka frymëzuar dhe më ka sjellë deri në këtë moment”, u shpreh aktorja.

Në Ditën Botërore të Teatrit, ministri i Kulturës, Kujtim Gashi, ka ndarë Çmimin Vjetor për Vepër Jetësore dhe çmimet të tjera për teatër. Aktorja Myrvete Kurtishi është laureate e çmimit për Vepër Jetësore sivjet, në bazë të vlerësimit të jurisë profesionale, me motivacionin `një jetë kushtuar teatrit`.

Çmimi ka edhe shpërblim financiar në bazë të rregullores për ndarjen e çmimeve për teatër në vlerë prej 5000 eurosh.

“Ndoshta kisha dalë para një mijë personash për ta dhënë shfaqjen, pa m’u dridhur duart dhe goja, por kjo është sakrifica ime për dyzetë vjet”, tha ndër të tjera aktorja Kurtishi, e cila falënderoi të gjithë bashkëpunëtoret që e kanë përkrahur gjatë gjithë karrierës së saj për katër dekada.

“Falënderoj edhe publikun tim, i cili më ka rritur, më ka krijuar, më ka frymëzuar dhe më ka sjellë deri në këtë moment”, u shpreh aktorja.

Çmimi për shfaqjen më të mirë iu nda Teatrit të Qytetit të Prizrenit  “Bekim Fehmiu” për shfaqjen “Armiku i Popullit”, shfaqje me regji të Fatos Berishës.

Ndërkaq, çmimi për regjisorin më të mirë iu nda Kushtrim Bekteshit për shfaqjen “Ata që ikin”. Të dy çmimet shpërblehen me vlerë monetare me nga 2500 euro secili.