Ambasada amerikane: Nuk u konsultuam për ushtrinë

Ambasada amerikane thotë se nuk u konsultuan për projektligjin për ushtrinë Ambasadës e SHBA-së në Prishtinë ka reaguar pas miratimit në Qeveri të projektligjit për transformimin e FSK-së në ushtri.

Ata thonë se nuk janë këshilluar për këtë hap nga institucionet e Kosovës.

“Shtetet e Bashkuara të Amerikës gjithmonë e kanë mbështetur të drejtën sovrane të Kosovës për ushtri dhe kanë punuar ngushtë me Kosovën rreth mënyrës për ta arritur këtë. Ne kemi këshilluar një qasje të matur që e mban Kosovën në përputhje me aleatët tanë në NATO për këtë hap të rëndësishëm. Nuk jemi këshilluar për çastin e këtij lajmërimi dhe do të na duhet t’i analizojmë projektligjet për ta kuptuar qëllimin dhe efektin e tyre”, thuhet në reagim.

Aty theksohet se përpjekjet e tyre në këtë kohë kanë qenë të përqendruar në ndërtimin e konsensusit të brendshëm për dialogun me Serbinë.

“Vazhdojmë të besojmë se normalizimi ndërmjet Kosovës dhe Serbisë është hapi më i rëndësishëm për përparim në të ardhmen e afërt”, thuhet ndër të tjera në reagimin e ambasadës.

---