Ambasada amerikane paralajmëron qytetarët e saj në Kosovë

Ambasada e SHBA-së në Prishtinë ka këshilluar qytetarët e saj që gjenden në Kosovë që të shmangin organizimet e mëdha dhe të jenë të vëmendshëm këto ditë

Ambasada e Shteteve të Bashkuara të Amerikës në Prishtinë këshillon qytetarët amerikanë të kenë kujdes të veçantë gjatë pushimeve të ardhshme fetare dhe në festivale apo ngjarje të mëdha, njofton albinfo.ch.

“Terroristët në rajon më parë kanë pasur caqe objektet e ndjeshme, përfshirë kishat dhe objektet e kulteve tjera, qendrat e këmbësorëve, arenat sportive, sallat e koncerteve dhe tubimet publike. Rishikoni planet tuaja të sigurisë: rrini të vetëdijshëm për vendndodhjen tuaj, përfshirë edhe ngjarjet lokale dhe shikoni televizionet për përditësim të lajmeve”, thuhet në njoftimin e Ambasadës.

Ambasada ka sugjeruar qytetarët e saj që të jenë shumë të vëmendshëm. “Mbani nivel të lartë të vigjilencës dhe ndërmerrni hapat e duhur për të rritur sigurinë tuaj personale. Nëse ndodh një sulm terrorist në qytetin tuaj ose ku do të udhëtoni, qytetarët amerikanë duhet: Të ndjekin instruksionet e forcave ligjore dhe shërbyesve emergjentë. Të monitoroni uebfaqen e ambasadës për siguri”.