Apelon policia: Mos shkoni në Merdare

Ditë më parë ishin krijuar kolona të gjata, ku pritjet ishin deri në katër orë

Policia e Kosovës vazhdon të informojë të gjithë qytetarët e Kosovës, e në veçanti ata të cilët shfrytëzojnë për qarkullim, respektivisht për kalim kufitar pikën kufitare Merdare që Kosovën me Serbinë, lidhur me punimet që janë duke u kryer në këtë pikë kufitare, duke bërë thirrje që të mos kalohet andej, shkruan albinfo.ch.

“Në pikën e kalimit të kufirit Merdare, nga 1 deri më 15 nëntor 2017, vazhdon të ketë kohë pas kohe ndërprerje të trafikut/qarkullimit për shkak të punimeve dhe mund të krijohen pritje më të gjata se pritjet normale të kalimit kufitar.

Andaj me qëllim të shmangies së pritjeve të mundshme, informojmë të gjithë qytetarët që gjatë kësaj periudhe kohore mundësisht t’i shfrytëzojnë pikat tjera të kalimit kufitar me Serbinë”, thuhet në njoftimin e policisë.

Ditë më parë ishin krijuar kolona të gjata, ku pritjet ishin deri në katër orë, përkundër se nuk është sezoni i verës.

Policia e Kosovës edhe më parë ka njoftuar qytetarët lidhur me punimet që po zhvillohen në atë pikë kontrolli kufitar dhe me rrjedhën e qarkullimit në hyrje dhe dalje, duke pas parasysh përqendrimin e njerëzve dhe automjeteve në këtë pikë kufitare.