Arrestohet një qytetar i Kosovës në Gjermani

Autoritetet gjermane arrestuan një shtetas të Kosovës, i cili akuzohet se ka mbështetur grupin militant Shteti Islamik (IS), duke transferuar mijëra euro për një luftëtar dhe një rekrut të mundshëm.

Zyra e Prokurorit Federal tha se 31-vjeçari, i identifikuar vetëm si Hasan R. B, u arrestua të mërkurën në zonën e Pinebergut, pranë Hamburgut, raporton AP.

Ai dyshohet për 15 akuza për mbështetjen e grupit militant Shteti Islamik dhe 11 akuza për shkeljen e ligjeve gjermane të eksportit, transmeton Evropa e Lirë.

Prokurorët thanë se i dyshuari ka bërë 11 transferime në vitet 2016 dhe 2017, për një luftëtar të IS-it në Siri, përcjell albinfo.ch.

Po ashtu sipas Prokurorisë, në vitin 2015, ai i ka transferuar para një personi nga Maqedonia e Veriut, i cili dëshironte të bashkohej me luftëtarët e IS-it në Siri. Në total, ai ka transferuar rreth 15,000 euro.

Sipas të dhënave zyrtare në Kosovë, nga viti 2012 deri në vitin 2016, mbi 400 qytetarë të Kosovës kanë shkuar në zonat e luftës në Siri dhe Irak.

Më shumë se 130 persona janë dënuar në Kosovë për pjesëmarrje në luftërat në Siri dhe Irak.