Artistët shqiptarë shkëlqejnë në Beograd

Artistët e Teatrit të Operës dhe Baletit të Shqipërisë, me veprën “Carmen” shkëlqyen në teatrin e Beogradit. Vikena Kamenica, Armando Likaj, Renisa Lacka dhe Armaldo Kllogjeri performuan operën “Carmen” në Teatrin Kombëtar të Beogradit, duke marrë duartrokitjet e publikut.

Ministria e Kulturës e Shqipërisë shkruan se kjo operë erdhi në skenë në kuadër të bashkëpunimit mes dy institucioneve, përcjell albinfo.ch.

“Kjo operë vihet në skenë në kuadër të protokollit të bashkëpunimit të nënshkruar nga Teatri Kombëtar i Operës, Baletit dhe Ansamblit Popullor dhe Teatri Kombëtar i Beogradit. Kujtojmë se në muajin shtator opera “Carmen” në Tiranë u realizua me bashkëpunimet e ndërsjella të dy teatrove, me pjesëmarrjen e dirigjentit Dejan Saviq dhe këngëtarëve lirikë Ljubica Vranes dhe Janko Sinadinoviq, solistë të Teatrit Kombëtar të Beogradit”, bën me dije Ministria e Kulturës.