Berlin: Kinematografia kosovare prezantohet denjësisht në European Film Market

Prezenca në kuadër të Berlinale-s forcon pozitën e kinematografisë kosovare në skenën ndërkombëtare

Qendra Kinematografike e Kosovës (QKK) ka përmbyllur me sukses pjesëmarrjen e saj në European Film Market, i cili u mbajt në këtë muaj, në kuadër të Berlin International Film Festival (Berlinale), në Berlin, transmeton albinfo.ch.

Sipas një postimi zyrtar të QKK-së në facebook, prezenca në një nga ngjarjet më të rëndësishme të industrisë filmike evropiane përbën një hap të rëndësishëm drejt forcimit të pozitës së kinematografisë kosovare në tregun ndërkombëtar.

Gjatë qëndrimit në Berlin, përfaqësuesit e QKK-së zhvilluan takime me producentë, distributorë dhe përfaqësues institucionesh filmike nga vende të ndryshme, me qëllim të zgjerimit të bashkëpunimeve dhe promovimit të projekteve filmike nga Kosova.

Pjesëmarrja në European Film Market konsiderohet si një mundësi e rëndësishme për krijimin e partneriteteve të reja dhe për rritjen e dukshmërisë së filmave kosovarë në tregjet evropiane dhe më gjerë./Albinfo.ch

---