Këshilltarët federalë shpërndahen në mbarë Zvicrën për Festën Kombëtare të 1 Gushtit

Presidenti Guy Parmelin dhe ministri Albert Rösti do të kenë agjendat më të ngarkuara, me fjalime në disa kantone gjatë dy ditëve

Shtatë anëtarët e Këshillit Federal do të marrin pjesë në dhjetëra aktivitete në të gjithë Zvicrën me rastin e Festës Kombëtare të 1 Gushtit, duke mbajtur fjalime në qytete dhe komuna të ndryshme. Programi nis më 31 korrik dhe vazhdon gjatë gjithë ditës së 1 gushtit, transmeton albinfo.ch.

Presidenti i Konfederatës, Guy Parmelin, do të mbajë katër fjalime. Ai do ta nisë turneun në Renens (Vaud), më pas do të marrë pjesë në mëngjesin tradicional të fermerëve në Hildisrieden (Lucern), do të flasë në livadhin historik të Rütlit (Uri), ku shënohet edhe 100-vjetori i Shoqatës Zvicerane të Kostumeve Tradicionale, dhe do ta përmbyllë ditën në Essertines-sur-Rolle (Vaud).

Ministri i Transportit, Albert Rösti, do të ketë agjendën më të ngarkuar, me pesë paraqitje publike. Ai do të vizitojë Fehraltorfin, Val Müstairin, St. Moritzin, si dhe komunat Sigriswil dhe Uetendorf në kantonin e Bernës.

Edhe ministri i Mbrojtjes, Martin Pfister, do të zhvillojë katër aktivitete. Pas fjalimit në Rorschach, ai do të vizitojë Baarin, Blenion në Ticino dhe Guardan në Graubünden. Ndërkohë, ministrja e Brendshme, Elisabeth Baume-Schneider, do të mbajë fjalime në Lucern dhe në komunën Boécourt të kantonit Jura.

Pjesa tjetër e anëtarëve të Këshillit Federal do të shpërndahen gjithashtu në kantone të ndryshme për të marrë pjesë në festimet tradicionale, duke vijuar praktikën shumëvjeçare që autoritetet më të larta shtetërore të jenë pranë qytetarëve në ditën e festës kombëtare të Zvicrës.

---