Zvicra e ndarë për kufizimin e blerjeve të pronave nga të huajt

Qeveria synon ta ashpërsojë ligjin “Lex Koller”, por bizneset paralajmërojnë pasoja për tregun dhe investimet

Planet e Qeverisë zvicerane për kufizimin e mëtejshëm të blerjeve të pronave nga personat që jetojnë jashtë vendit kanë shkaktuar ndarje të thella mes partive politike dhe përfaqësuesve të ekonomisë. Konsultimi publik për ndryshimet e propozuara në ligjin Lex Koller përfundoi të mërkurën, transmeton albinfo.ch.

Sipas propozimit, personat me banim jashtë Zvicrës nuk do të lejoheshin më të blinin aksione në kompani të listuara në bursë që zotërojnë prona banimi. Qeveria e arsyeton masën me situatën e tensionuar në tregun e banesave dhe me nevojën për të frenuar ndikimin e kapitalit të huaj në çmimet e pronave.

Propozimi ka marrë mbështetje nga dy parti që zakonisht ndodhen në pole të kundërta politike: Partia Socialdemokrate dhe Partia Popullore Zvicerane. Të dyja argumentojnë se investimet e huaja po kontribuojnë në rritjen e çmimeve të pasurive të paluajtshme dhe po e bëjnë më të vështirë sigurimin e banimit për popullsinë vendase.

Në anën tjetër, shoqatat e biznesit, Partia e Qendrës dhe organizatat që përfaqësojnë rajonet malore e kundërshtojnë ashpërsimin. Ato paralajmërojnë se kufizimet mund ta dëmtojnë Zvicrën si vend për investime dhe të krijojnë vështirësi serioze për kompanitë e sektorit të pasurive të paluajtshme.

Disa kompani kanë paralajmëruar madje se mund të largohen nga bursa, ndërsa përfaqësuesit e sektorit e konsiderojnë të pazbatueshme kërkesën për verifikimin e origjinës dhe statusit të çdo investitori. Për këtë arsye, debati pritet të vazhdojë edhe gjatë përgatitjes së versionit përfundimtar të ndryshimeve ligjore.

 

 

 

 

 

---