Asnjë shqiptar në Parlamentin e qytetit të Lucernit

Më së afërmi këtij caku ka qenë Flamur Rrmoku. Ky i ri që punon si ekspertt në diagnostikën neuropsikologjike, ka marrë 3375 vota

Në zgjedhjet e mbajtura të dielën për Parlamentin e qytetit të Lucernit, për 48 vendet në dispozicion kanë kandiduar afër 200 veta, në mesin e të cilëve edhe pesë shqiptarë.

Flamur Rrmoku ka kandiduar per listën 4 që përfshinte Partinë Socialdemokrate dhe sindikatat. Ndërsa Ardita Berisha, Drilon Bekiri, Shpëtime Çallaku dhe Armin Çekaj kanë bërë pjesë në listën 9 SP-Second@s Plus.

Asnjëri nga këta kandidatë nuk ka mundur të kalojë pragun që do t`i mundësonte zgjedhjen në parlament. Por, më së afërmi këtij caku ka qenë Flamur Rrmoku. Ky i ri që punon si ekspertt në diagnostikën neuropsikologjike, ka marrë 3375 vota. Ndërkaq delegati i zgjedhur me më së paku vota në listën e tij ka pasur 3979 vota.

Katër shqiptarët tjerë kandidatë, me numrin modest të votave të fituara, kanë qenë larg nga mundësia për të fituar një vend në parlament.

Kështu, Ardita Berisha, studente e pedagogjisë sociale ka fituar 803 vota, Drilon Bekiri, animator sociokulturor 662, Shpëtime Çallaku mediatore, 587  dhe Armin Çekaj, shërbyes teknik, 513 vota.

Në legjislaturën e kaluar në Parlamnentin e Qytetit të Lucernit bënte pjesë Ylfete Fanaj, e cila pastaj, vitin e kaluar, fitoi zgjedhjet në nivel kantonal dhe tash përfaqëson partinë e saj (SP) në Parlamentin e Kantonit të Lucernit.