Austria njeh kontributet pensionale të Shqipërisë

Kështu të gjithë shqiptarët që kanë punuar në Austri do t’u njihen të gjitha vitet e punës për pension

Qeveria shqiptare me anë të një komunikate për media ka bërë të ditur se kanë nënshkruar një marrëveshje me Austrinë për njohjen e kontributeve pensionale, raporton albinfo.ch.

Marrëveshja është nënshkruar nga Ministri i Mirëqenies Sociale të Shqipërisë, Blendi Klosi dhe homologu i tij austriak Alois Stoger.

“Kemi arritur një sërë marrëveshjesh të rëndësishme. Kemi në proces marrëveshje të tjera, ku shqiptarët janë një komunitet i rëndësishëm. Vjena do të mbështesë transformimin e shërbimeve në Shqipëri. Austria është mbështetëse e Paktit të Mirëqenies Sociale”, është shprehur ministri Klosi.

Kështu të gjithë shqiptarëve që kanë punuar në Austri do t’u njihen të gjitha vitet e punës për pension.

Ministri Klosi ka bërë të ditur se janë duke punuar që të nënshkruajnë marrëveshje të tilla me Greqinë, Italinë dhe Kanadanë, kurse kanë me Gjermaninë, Belgjikën, Luksemburgun, Hungarinë, Republikën Çeke, Rumaninë dhe Maqedoninë.