Austriaku që u gjet i vdekur në një hotel në Prishtinë, ishte biznesmen

Gernot J. biznesmen, 47-vjeçar, nga Uellsi i Austrisë, pasditen e së premten është gjetur i vdekur në dhomën e një hoteli në Prishtinë, shkruan gazeta austriake “Kronen Zeitung”, përcjell albinfo.ch.

Sipas gazetës, biznesmeni austriak kishte vizituar disa herë Kosovën për çështje biznesi. Ndër të tjera thuhet se ai kishte pasur një takim në hotel me një partner biznesi. Megjithatë, gazeta ngre dyshimet nëse kishte ndodhur vërtet ai takim dhe nëse mund të ketë lidhje me vdekjen e biznesmenit austriak.

Nëse takimi në të vërtetë ka ndodhur, apo nëse ka lidhje me vdekjen e 47-vjeçarit, është ende e paqartë. Gjithçka që është e sigurt, është se Gernot J. u gjet i vdekur në dhomën e tij të hotelit, rreth orës 15:00 pasdite”, thekson ndër të tjera gazeta austriake. Lidhur me rastin është njoftuar edhe Ministria e Punëve të Jashtme e Austrisë.

 Por në Policinë e Kosovës shkurt kanë thënë se nuk kanë njohuri për një rast të tillë, pasi që askush nuk i ka njoftuar se gjatë së premtes ka ndodhur ndonjë vdekje e dyshimtë. 

‘Krone Zeitung’ nga burimet e saj thotë se vdekja po cilësohet si vdekje e dyshimtë, duke e lënë të hapur mundësinë që në rast të jetë e përfshirë një palë e tretë. “Është urdhëruar një autopsi për të sqaruar rrethanat e vdekjes”, thuhet ndër të tjera në shkrimin e gazetës austriake.