Lajme

BAG, Zvicër: “Perspektivat janë premtuese”

"Mund të thuhet se situata është akoma mjaft e brishtë. "Por perspektivat janë premtuese," është shprehur Masserey, zëvendësshefe e BAG

“Shifrat po vazhdojnë të rriten, por ngadalë”, është shprehur Virginie Masserey, përfaqësuese e BAG, duke hapur konferencën e sotme për media, në Bernë.

Aktualisht realizohen rreth 25,000 teste në ditë. Numri i shtrimeve në spital ka shënuar një rritje të lehtë, ka thënë ajo, raporton srf.ch.

Sa u përket varianteve të reja të virusit, situata vazhdon të jetë e njëjtë: Pothuajse të gjitha infeksionet i takojnë variantit B.1.1.7 (britanik), transmeton albinfo.ch. Është konstatuar se incidencat në vendet fqinje janë më të larta se në Zvicër.

“Fushata e vaksinimit po ecën përpara” ka thënë Masserey më tutje. 13 për qind e popullsisë kanë marrë tashmë të paktën një vaksinë. Numri i njerëzve të vaksinuar plotësisht është 690,000, që korrespondon me 8% të popullsisë. 70% e njerëzve mbi 75 vjeç kanë marrë tashmë dozën e tyre të parë (sipas të dhënave nga 15 kantone).

Gjëja më e rëndësishme është që të injektohen sa më shumë doza të jetë e mundur, thotë Masserey, përcjell albinfo.ch.

Është rritur numri i dozave që ka marrë Zvicra ndërsa deri në fund të javës do të mbërrijnë edhe 350,000 doza nga Moderna.

Si përmbledhje, mund të thuhet se situata është akoma mjaft e brishtë. “Por perspektivat janë premtuese,” është shprehur Masserey.