BE: Propozimi i ri për themelimin e Asociacionit, i balancuar

@pixabay

Bashkimi Evropian është në pritje të Kosovës dhe Serbisë, për të ecur para në propozimin evropian, i cili ndonëse si përmbajtje vazhdon të mbetet sekret, sipas tyre, në parim është pranuar nga palët dhe i njëjti duhet të zbatohet pa parakushte.

Zëdhënësi i BE-së, Peter Stano, ka thënë se në takimin e 26 tetorit, në Bruksel, palët kanë pranuar propozimin e liderëve evropianë, përcjell albinfo.ch.

“Ata paraqitën një propozim të ri të balancuar evropian për themelimin e Asociacionit të Komunave dhe këmbëngulën që palët të fillojnë zbatimin e tij. Kjo do të çonte përpara procesin e normalizimit dhe do të zbuste rrezikun për përshkallëzim dhe dhunë të re.  Në takim palët sinjalizuan gatishmërinë ‘parimisht’ për ta pranuar këtë propozim evropian, por të dyja kishin parakushte që të ishin të papranueshme nga pala tjetër. Ne presim që kjo gatishmëri të çojë në zbatim pa vonesa të mëtejshme. Parakushtet nuk janë të pranueshme”, ka thënë ai për RTK.

Ai ka ritheksuar se dokumenti i dorëzuar nuk është publik.

“Propozimi i BE-së nuk është bërë publik, pasi përpjekjet diplomatike janë në vazhdim dhe ne asnjëherë nuk kalojmë dokumente zyrtare që po diskutohen, pasi është praktikë normale në ndërmjetësimin ndërkombëtar. Është gjithashtu politika jonë e kahershme që të mos komentojmë rrjedhjet e supozuara ose raportet e medieve që pretendojnë se e kanë parë ose publikuar dokumentin”, ka thënë ndër të tjera ai.