Behrami: Nëse shënoj, do të festoj

“Festimi i një goli është pjesë e ndeshjes. Nëse do t’i shënoja Shqipërisë sigurisht që do të festoja. Për këtë nuk ka dyshime, sepse unë sa herë shënoj dua të festoj", deklaroi Behrami

Valon Behrami edhe një herë ka përsëritur se është krenar që luan për Zvicrën, derisa në një intervistë për “The Guardian”, ai ka folur edhe për Kosovën dhe Shqipërinë. Madje, është shprehur se do të festojë nëse shënon ndaj Shqipërisë, shkruan albinfo.ch.

“Unë jam shumë i lumtur që do të përfaqësoj Zvicrën dhe ngjyrat e këtij flamuri në Evropian. Do të luftoj për këtë vend, i cili i ka dhënë gjithçka familjes time. Shpresoj të bëjmë një Evropian sa më të mirë dhe të shkojmë larg”, është shprehur Behrami.

Ai foli për takimin e parë të Evropianit ndaj Shqipërisë. “Festimi i një goli është pjesë e ndeshjes. Nëse do t’i shënoja Shqipërisë sigurisht që do të festoja. Për këtë nuk ka dyshime, sepse unë sa herë shënoj dua të festoj. Unë e dua shumë futbollin dhe kjo lojë është kënaqësi. Sigurisht që është një ndeshje delikate dhe duhet të dimë të menaxhojmë mjaft mirë aspektin psikologjik”, vazhdoi ai.

Behrami bëri të qartë edhe një herë se nuk e ka ndërmend t’i bashkohet Kosovës. “Unë e kam vendosur që do të luaj vetëm për një ekip kombëtar gjatë gjithë karrierës time”, tha Behrami duke dhënë një mesazh të qartë për Kosovën.