BioNTech synon 2 miliardë vaksina më 2021

Keystone

Prodhuesi gjerman i vaksinave COVID-19, BioNTech, partner i grupit farmaceutik amerikan Pfizer, tha të hënën se synon të prodhojë dy miliardë doza të vaksinës së tij këtë vit.

“Ne tani besojmë se mund të japim afërsisht rreth 2 miliardë doza në total deri në fund të vitit 2021”, tha BioNTech në një prezantim, shkruan “Reuters”, përcjell albinfo.ch.

Për të qenë efektive, vaksina Pfizer/BioNTech duhet të jepet në dy doza, me një diferencë kohore prej tri javësh.

Kjo vaksinë është miratuar nga Bashkimi Evropian në fund të muajit të kaluar dhe është po ashtu në përdorim në Britani, Kanada, Shtetet e Bashkuara dhe vende të tjera.

Një zëdhënëse e BioNTech-ut tha se 50 milionë doza të vaksinës janë prodhuar në fund të vitit 2020, siç edhe ka qenë e planifikuar më parë, porse dërgesat janë lënë në pritje, derisa janë bërë porosi specifike, për të shmangur kohën e tepërt të magazinimit.

Bashkimi Evropian dhe Shtetet e Bashkuara janë kritikuar për ritëm të ngadalshëm të vaksinimit.