Caritasi zviceran ndihmon fermerët në kultivimin e mjedrës

Bëhet fjalë për fermerët në Luginën e Lumëbardhit, të cilët po kultivojnë mjedrën, frutat më të kërkuara në tregun evropian.

Ismet Osmani tashmë ka përfituar një përvojë mjaft të mirë në kultivimin e mjedrës, që i është përshtatur shumë mirë kushteve klimatike të këtij vendi.

Ai këtë biznes e ka nisur vetëm me 3 ari hapësirë, ndërsa sot, në tërë këtë Luginë, 22 ha tokë janë të mbjella me mjedër. Osmani thotë se ka arritur t’i realizojë të gjitha pritjet që ka ëndërruar.

Siç raporton RTK, mbështetje këtyre fermerëve iu ka dhënë Caritasi zviceran.
Nga kjo fushë, sipas Kreshnik Bashës, kanë gjeneruar mbi 800 mijë euro të ardhura. Basha thotë se këtë vit fermerët e Luginës së Lumëbardhit do të ndihmohen edhe me mikrokredi.

Në këtë lëmi tashmë janë të punësuar rreth 120 punëtorë, ndërsa në sezonin e vjeljes ky numër dyfishohet.

Tani janë regjistruar 14 kompani prodhuese, ndërsa në shërbim të tyre janë 13 frigoriferë të kapaciteteve të mëdha për ruajtjen e prodhimit.