Futboll

Challandes: Do të ishte një nder për mua nëse do ta drejtoja kombëtaren zvicerane

Mirëpo, ai theksoi për mediumin zviceran se momentalisht ka kontratë me Kosovën dhe shpreson që të kualifikohet në Kampionatin Evropian

Trajneri i Kosovës, Bernard Challandes, ka folur për të ardhmen e tij si trajner i Kosovës në një intervistë për mediumin zviceran “rts.ch”, transmeton albinfo.ch.

Gjatë intervistës, 68-vjeçari u pyet se a do të ishte i interesuar që ta merrte drejtimin e kombëtares zvicerane, derisa u përgjigj se kjo gjë do të ishte një nder për të.

“Kjo gjë do të ishte një nder nëse do ta drejtoja kombëtaren zvicerane”, u shpreh Challandes.

Mirëpo, ai theksoi për mediumin zviceran se momentalisht ka kontratë me Kosovën dhe shpreson që të kualifikohet në Kampionatin Evropian.

“Sigurisht, kjo do të më kishte interesuar, por tash mendoj se e kam kaluar moshën. Është e vërtetë që për një trajner, të drejtojë vendin e tij është një nder i veçantë”, u shpreh Challandes.

“Momentalisht jam trajner i Kosovës dhe dua t’i shkoj kontratës deri në fund, duke shpresuar që të kualifikohemi në Evropian. E di që në këtë punë duhet një energji e madhe, unë nuk dua të vazhdoj nëse nuk e ndjej forcën e nevojshme. Edhe nëse veproj sipas instinktit, mendoj për pensionimin, po”, ka shtuar ai.