Çka duhet të dini për pagën minimale të planifikuar të Cyrihut?

Votuesit në qytetin zviceran të Cyrihut kanë miratuar një lëvizje për të zbatuar një ligj të ri të pagës minimale për banorët.

Së bashku me Winterthur, qyteti i dytë më i madh i kantonit, Cyrihu do të ketë nga viti 2024 një ligj për pagën minimale për punëtorët me pagën më të ulët, dy qytetet e para zvicerane që miratojnë një lëvizje të tillë, shkruan The Local.

Ligjet e tjera të pagave minimale në Zvicër janë vetëm në nivele kantonale.

Në Cyrih, 69% e votuesve miratuan pagën minimale prej 23,90 franga në orë, ndërsa në Winterthur paga do të vendoset në 23 franga në orë, pasi 65% e votuesve e pranuan propozimin.

“Moment historik”

Pranimi në qendrat e votimit “përfaqëson përparim konkret për dhjetëra-mijëra njerëz që ende punojnë sot me paga shumë të ulëta”, tha Federata e Unionit Zviceran në një deklaratë të dielën, përcjell albinfo.ch.

Cédric Wermuth, bashkëkryetar i Partisë Social Demokrate, e përshkroi atë si një “moment historik”.

Deri më sot, vetëm kantonet e Gjenevës, Basel-City, Neuchâtel, Jura dhe Ticino kanë vendosur paga minimale.

Për kë është menduar kjo pagë minimale?

Rreth 17,000 banorë të Cyrihut me të ardhura të ulëta, dy të tretat e të cilëve janë gra, do të shohin që pagat e tyre për orë të rriten në 23,90 franga në orë – rreth 4,000 franga në muaj.

Ligji pritet të hyjë në fuqi nga viti 2024.

Personat nën 25 vjeç pa diplomë profesionale, praktikantët, si dhe ata që i nënshtrohen një stazhi maksimumi 12 muajsh, nuk kanë të drejtë sipas legjislacionit të ri, shkruan The Local.

Gjithashtu, njerëzit që fitojnë një pagë që është mbi minimumin e kërkuar, siç bëjnë shumica e njerëzve në Cyrih, Winterthur dhe Zvicër në tërësi, do të vazhdojnë të marrin pagat e tyre të zakonshme, në vend që t’i ulen ato në minimumin e kërkuar.

Pse është kjo e rëndësishme?

Ndryshe nga shumica e vendeve evropiane, Zvicra nuk ka një pagë minimale kombëtare.

Në vitin 2014, vendi mbajti një referendum që propozoi vendosjen e pagës minimale në 22 franga në orë, por masa u refuzua nga 76.3% e votuesve.

Ata pranuan argumentin e qeverisë se një pagë minimale e detyrueshme do t’i detyronte kompanitë më të vogla të dilnin nga biznesi, përcjell albinfo.ch.

Në Zvicër, ku pagat janë ndër më të lartat në botë, rreth 6,500 franga në muaj mesatarisht në vitin 2023, pagat varen kryesisht nga kontratat individuale të punës, të cilat, nga ana tjetër, përcaktohen nga marrëveshjet kolektive, të negociuara midis sindikatave të punëtorëve dhe punëdhënësve.

---